એક વ્યથિત ફેસબુક યુઝરનું ફેસબુક પર ફેસબુકમાંથી રાજીનામું :-)
છેલ્લાં ૧૦ વર્ષથી ફેસબુક પર પૉસ્ટ કરતાં કરતાં મને અનેકવિધ કૉમેન્ટ સાંભળવાની તક મળી છે. ફેસબુક તેમજ વૉટ્સએપે મને ખૂબ જ અગત્યની જવાબદારી એડ્મિન તરીકે સોંપી છે. (જે મેં જાતે જ લીધી હતી.) જેને હું મારું સદ્ભાગ્ય માનું છું.
ફેસબુકથી વૉટ્સએપ સુધી સોશિયલ મિડિયાના લોકોએ મારી પર વિશ્વાસ મૂક્યો તે માટે હું ઋણી છું. કુશળ સંગઠક, દીર્ઘદૃષ્ટા અને કર્મઠ આદરણીય શ્રી માર્ક ઝુકરબર્ગભાઈના નેતૃત્વ નીચે પહેલાં ફેસબુકમાં અને પછી વૉટ્સએપમાં કામ કરવાની મને તક મળી જેના કારણે સાતત્યપૂર્વક મારું ઘડતર થતું રહ્યું. છેલ્લાં ૧૦ વર્ષથી ફેસબુક ને વૉટ્સએપના પ્રૉફાઇલ પિક્ચર, કવર ફોટો, પોસ્ટ ફોરવર્ડ કરવી, લાઇક કરવી, સ્માઇલી સાથે કૉમેન્ટ લખવી, કોઈને ફ્રેન્ડ રિક્વેસ્ટ મોકલવી, કોઈને અનફ્રેન્ડ કરવા જેવી સોશિયલ મિડિયાના ખૂબ જ અગત્યના વિભાગોની કામગીરી કરતાં કરતાં અનેક (અન્યોએ મૌલિક લખેલી) રચનાત્મક પૉસ્ટમાં સુધારાઓ કરી (એટલે કે એમનું નામ કાઢી ને મારું નામ ઉમેરી) નવી પૉસ્ટ દ્વારા પારદર્શિતા લાવવા પ્રામાણિકતા સાથે પરિણામલક્ષી કાર્ય કરવા સતત પ્રયત્નશીલ રહ્યો છું. મે ૨૦૦૬માં ગુજરાત રાજ્યના પ્રથમ ફેસબુક યુઝર તરીકે માર્ક ઝુકરબર્ગભાઈએ જવાબદારી મને સોંપી તેને હું સમગ્ર ગુજરાતની જનતાનું ગૌરવ ગણું છું. ઑર્કુટથી ફેસબુકના મંચ પર કામ કરવા મારી પસંદગી થઈ તે સ્વાભાવિક રીતે જ આકાશના તારા ગણવા જેવું કઠિન કાર્ય હતું પરંતુ, મને એ વાતનો ગર્વ છે કે ઑર્કુટ પર વિકાસની કંડારેલી કેડી ફેસબુક પર એ જ ઝડપથી આગળ વધારવામાં હું ક્યાંય પાછો પડ્યો નથી.
ફેસબુકની લાઇક અને કોમેન્ટથી પ્રેરાઈ હું ફેસબુકમાં જોડાયો હતો અને આજ સુધી તેનું પાલન કરતો રહ્યો છું. છેલ્લા થોડાક સમયથી ફેસબુક પર લાઇક ઓછી મળે છે અને વિરોધી કોમેન્ટનો મારો થાય છે. મારો મોબાઇલ ડેટા પણ પૂરો થનાર છે. પરંતુ રિયો ઑલિમ્પિક, ગુજરાત, ઉત્તર પ્રદેશ, પંજાબ વિધાનસભાની ચૂંટણી ૨૦૧૬-૧૭માં આવવાની હોઈ તેમજ દર બે વર્ષે યોજાતા રાજ્ય માટે મહત્ત્વના વાઈબ્રન્ટ ગુજરાત સમીટ પણ જાન્યુઆરી 2017માં યોજાનાર હોઈ પાનના ગલ્લા જેવી કૉમેન્ટ કરવા માટે નવનિયુક્ત થનાર ફેસબુક યુઝરને પૂરતો સમય મળી રહે તે માટે મેં બે માસ અગાઉ ઝુકરબર્ગભાઈ સમક્ષ મને આ જવાબદારીમાંથી મુક્ત કરવા માટે વિનંતી કરેલ. હું આજે ફરીથી આ પત્ર દ્વારા ઝુકરબર્ગને મને ફેસબુક યુઝર પદની જવાબદારીમાંથી મુક્ત કરવા નમ્ર વિનંતી કરું છું.
ફેસબુકની ગૌરવશાળી (!) પ્રજાની પોસ્ટ પર લાઇક કરવાની મને તક મળી અને છેવાડાના યુઝર સુધી લાઇકનો લાભ પહોંચાડવા માટે મેં શક્ય તમામ પ્રયત્નો કર્યા છે. ફેસબુકરૂપી પરિવારનું નેતૃત્વ કરતા મને જે અપાર ગાળો અને લાઇક, ડિસલાઇક ને એન્ગ્રી ને સેડ બટન દબાવતા રહેવાની સતત પ્રેરણા મળી છે તે માટે હું મારી હૃદયપૂર્વક કૃતજ્ઞતા વ્યક્ત કરી વંદન કરું છું.
લિ. એક વ્યથિત ફેસબુક યુઝર
