આજે મે ૧,૨૦૧૫ ,ગુજરાતનો ૫૬ મો જન્મ દિવસ - સ્થાપના દિવસ .

જય જય ગરવી ગુજરાત -

આજે મે ૧,૨૦૧૫ ,ગુજરાતનો ૫૬ મો જન્મ દિવસ - સ્થાપના દિવસ .

મે ૧, ૧૯૬૦ના મંગલ પ્રભાતે ગાંધી મુલ્યોના પ્રતિક જેવા પૂજ્ય રવિશંકર મહારાજના વરદ હસ્તે એમના આશીર્વાદ સાથે ગુજરાતના અલગ પૂર્ણ રાજ્યનો મંગલ પ્રારંભ અમદાવાદ ગાંધી આશ્રમ ખાતેના પવિત્ર સ્થળે રાખેલ સમારંભમાં થયો હતો.
આ સ્થાપના દિન બાદ ૫૫ વર્ષો વીતી ગયાં એ દરમ્યાન ગુજરાત રાજ્યે અભિનંદનીય પ્રગતી સાધી વિકાસની દ્રષ્ટીએ દેશના પ્રથમ નંબરના વિકસિત રાજ્ય તરીકે ઉભરી આવ્યું છે .

ગુજરાત રાજ્ય આજે ૫૬મા વર્ષમાં જાહોજલાલી સાથે મંગળ પ્રવેશ કરે છે એ શુભ પ્રસંગે દેશ અને પરદેશમાં રહેતા દરેક ગુજરાતી ભાઇ-બહેનોને અભિનંદન અને અભિવાદન છે. ખમીરવંતી વિશ્વ ગુર્જરીને ખુબ ખુબ શુભેચ્છાઓ.

ગુજરાતે ભારતને તેની સ્વાતંત્ર્ય ચળવળ ના બે મહાન નેતા મહાત્મા ગાંધી અને સરદાર વલ્લભભાઈ પટેલની ભેટ આપી છે એ માટે ગુજરાત ગૌરવ અનુભવી શકે.ગાંધીજીની આગેવાની નીચે દેશ સ્વતંત્ર થયો અને એ પછી સરદારે દેશને ટુકડાઓમાં વિભાજીત થતો બચાવીને એક અવિભાજ્ય દેશનો દરજ્જો જાળવી રાખીને દેશની ખુબ જ મોટી સેવા બજાવી છે જેના માટે દેશ હંમેશાં એમને યાદ કરતો રહેશે.

ગુજરાતે ભારતને શ્રી મોરારજીભાઈ દેસાઈ અને હાલ શ્રી નરેન્દ્ર મોદી જેવા રાષ્ટ્ર પ્રેમી વડા પ્રધાન અને બીજા અનેક દેશભક્તો અને ઉદ્યોગપતિઓ પણ આપ્યા છે જેને માટે ગુજરાત ગૌરવ લઇ શકે છે .

દેશ અને વિશ્વના ફલક ઉપર ગુજરાત એક વિકસિત અને ધનિક રાજ્યની ખ્યાતી ધરાવે છે એનો યશ એના ૧૪મા મુખ્ય પ્રધાન શ્રી નરેન્દ્ર મોદીના ૧૨ વર્ષના કાર્ય દક્ષ વહીવટને ફાળે મુખ્યત્વે જાય છે.

ગુજરાતના ૧૫મા મુખ્ય પ્રધાન પદે હાલ એક અનુભવી અને લોક પ્રિય મહિલા શ્રીમતી આનંદીબેન પટેલ છે અને એમના કાર્યદક્ષ વહીવટમાં પણ શ્રી મોદીને પગલે પગલે ગુજરાતની વિકાસ યાત્રા વણથંભી ચાલુ રહી છે એ એક શુભ ચિન્હ છે. ગુજરાત અને તેમાં વસતા સાડા પાંચ કરોડ ગુજરાતીઓ ઉપરાંત અનેક સાહસિક ગુજરાતીઓ જેઓ પૈસા કમાવા અને બહેતર જીવનની ખોજ માટે વિશ્વના ખૂણે ખૂણે પહોંચી ગયા છે તેઓ ગુજરાતની આ પ્રગતિ માટે ગૌરવની લાગણી મહેસુસ કરે છે.

જય જય ગરવી ગુજરાત,દીપે અરુણું પ્રભાત(ગીત) –આદ્ય કવિ નર્મદ

ગુજરાતના આ સ્થાપના દિવસને ગુજરાતની સાચી ઓળખ વિષે પ્રથમ વિચાર વ્યક્ત કરનાર આદ્ય કવિ વીર નર્મદની ગુજરાતની અસ્મિતાને સુંદર રીતે રજુ કરતી કાવ્ય રચના “જય જય ગરવી ગુજરાત”નું ગીત આ વિડીયોમાં સાંભળી અને સાથે સાથે ગુજરાતનાં પ્રસિદ્ધ જોવા લાયક સ્થળોને પણ નિહાળીને કરીએ ..
http://www.youtube.com/v/I-Ys6urpaMQ…

ચાલો .ગુજરાતના આજના ૫૬મા જન્મ દિવસે આપણે ગુજરાતની અસ્મિતાના સંવર્ધન માટે જ નહીં, પણ વિશ્વમાં ગુજરાતની પ્રભુતાના સ્વપ્નને સિદ્ધ કરવા માટે કટીબદ્ધ થવાનો દ્રઢ સંકલ્પ કરીએ

જય જય ગરવી ગુજરાત ...... જય ભારત .....